सामूहिक विकास साकोसद्वारा विस्तारित मञ्च तथा प्रविधि साक्षरता तालिम सम्पन्न

सामूहिक विकास बचत तथा ऋण सहकारी संस्था लिमिटेडको आयोजनामा ‘विस्तारित मञ्च तथा प्रविधि साक्षरता तालिम’ आज शंकरनगरमा भव्य रूपमा सम्पन्न भएको छ। सहकारीको सेवालाई आधुनिक र प्रविधिमैत्री बनाउँदै सदस्यहरूलाई डिजिटल माध्यममा अभ्यस्त गराउने उद्देश्यले उक्त कार्यक्रम आयोजना गरिएको हो । कार्यक्रममा संस्थाका प्रमुख कार्यकारी अधिकृत श्री देवराज ज्ञवालीज्यूले संस्थाको परिचय, हालसम्मका गतिविधि र भावी लक्ष्यहरू समेटिएको विस्तृत प्रस्तुतीकरण गर्नुभएको थियो। उहाँले सहकारीको वित्तीय स्थिति र सदस्यहरूका लागि ल्याइएका नयाँ सुविधाहरूका बारेमा जानकारी दिनुभएको थियो ।

छलफलका क्रममा सदस्यहरूले उठाएका विभिन्न जिज्ञासा र विषयवस्तुहरूलाई संस्थाका अध्यक्ष र प्रमुख कार्यकारी अधिकृतले स्पष्ट पार्दै समाधानका उपायहरू प्रस्तुत गर्नुभएको थियो। यस अन्तरक्रियाले संस्था र सदस्यबीचको सम्बन्धलाई थप पारदर्शी र प्रगाढ बनाएको छ ।

प्रविधि साक्षरतामा जोड

शिक्षा तथा तालिम उपसमिति संयोजक श्री भिमलाल पाण्डेज्यूले विस्तारित मञ्च आयोजना गर्नुको उद्देश्य र वर्तमान समयमा सदस्यहरूका लागि प्रविधिको प्रयोग किन आवश्यक छ भन्ने बारेमा प्रकाश पार्नुभएको थियो। उहाँले सहकारीका सेवाहरूलाई मोबाइल एप र अन्य डिजिटल माध्यमबाट घरमै बसेर प्रयोग गर्न सक्ने बनाउन यो तालिम महत्वपूर्ण रहेको बताउनुभयो ।

तालिम सत्रमा संस्थाका सूचना प्रविधि सहायक श्री गोकुल सिंह गौंडले सदस्यहरूलाई संस्थागत कारोबार तथा अन्य डिजिटल सेवाहरू प्रयोग गर्ने तरिकाबारे प्रयोगात्मक शैलीमा सिकाउनुभएको थियो। कार्यक्रममा सदस्यहरूको उत्साहजनक र सक्रिय सहभागिता रहेको थियो ।

संस्थाका अध्यक्ष श्री पार्थमणि आचार्यज्यूको अध्यक्षतामा सम्पन्न भएको उक्त कार्यक्रममा उपाध्यक्ष श्री भूमिलाल सापकोटाज्यूले उपस्थित सम्पूर्णलाई स्वागत गर्नुभएको थियो। कार्यक्रमको सञ्चालन शिक्षा तथा तालिम उपसमिति संयोजक श्री भिमलाल पाण्डेज्यूले गर्नुभएको थियो ।

कार्यक्रममा संस्थाका सञ्चालक समितिका पदाधिकारीहरू, विभिन्न उपसमितिका सदस्यहरू एवं कर्मचारीहरूको उपस्थिति रहेको थियो। यस कार्यक्रमले सदस्यहरूलाई आधुनिक प्रविधि अपनाउन र सहकारीको अभियानलाई अझ प्रभावकारी बनाउन मद्दत पुग्ने विश्वास संस्थाले लिएको छ।