सामूहिक विकास सहकारीद्वारा विस्तारित मञ्च तथा उद्यमशीलता अभिमुखीकरण कार्यक्रम सम्पन्न

शंकरनगर, २८ जेठ २०८३

लुम्बिनी प्रदेशकै उत्कृष्ट सहकारीको रूपमा परिचित सामूहिक विकास बचत तथा ऋण सहकारी संस्था लि., तिलोत्तमा-३, शंकरनगर, रूपन्देहीको आयोजनामा विस्तारित मञ्च तथा उद्यमशीलता सम्बन्धी अभिमुखीकरण कार्यक्रम सम्पन्न भएको छ। संस्थाका अध्यक्ष पार्थमणि आचार्यको अध्यक्षतामा उक्त कार्यक्रम सम्पन्न भएको हो ।

१२ हजार भन्दा बढी सदस्यहरू आबद्ध भई हाल ३ अर्ब ६० करोड रुपैयाँको कुल वासलात सहित यस क्षेत्रको बलियो वित्तीय खम्बाको रूपमा स्थापित यस सहकारीले आफ्ना सदस्यहरूको व्यावसायिक क्षमता अभिवृद्धिका लागि यो कार्यक्रम संचालन गरेको हो ।

कार्यक्रममा उद्यमशीलता विकासका लागि गर्नुपर्ने आधारभूत कुराहरू, व्यावसायिक विकास योजना, प्रवर्द्धन तथा बजारीकरणका विविध पक्षबारे विस्तृत जानकारी गराइएको थियो। कार्यक्रमका अतिथि एवं उद्यमशीलता विज्ञ सहजकर्ता मुकुन्द ज्ञवालीले प्रशिक्षण दिँदै यस क्षेत्रमा रहेका व्यावसायिक सम्भावनाका क्षेत्रहरूबारे समेत संक्षिप्त प्रकाश पार्नुभएको थियो ।

सहकारीका सदस्यलाई उद्यमशीलतामा जोडिनेछ: अध्यक्ष आचार्य

कार्यक्रममा बोल्दै संस्थाका अध्यक्ष पार्थमणि आचार्यले सहकारीको महत्वपूर्ण सिद्धान्त "शिक्षा, तालिम र सूचना" लाई आत्मसात गर्दै सदस्यहरूलाई उद्यमशीलतामा जोड्ने उद्देश्यले यो तालिम आयोजना गरिएको बताउनुभयो । यस तालिमका माध्यमबाट सदस्यहरूमा स्वरोजगारका लागि थप उत्प्रेरणा मिल्ने विश्वास व्यक्त गर्दै उहाँले उद्यम गर्न चाहने सदस्यहरूका लागि वित्तीय सहायता अन्तर्गत संस्थाबाट न्यून ब्याजदरमा कर्जा प्रवाह गरिने प्रतिबद्धता समेत जनाउनुभयो ।

कार्यक्रमको अन्य व्यवस्थापन

कार्यक्रममा संस्थाका प्रमुख कार्यकारी अधिकृत देवराज ज्ञवालीले संस्थागत परिचय र संस्थाको वर्तमान वित्तीय अवस्थाबारे जानकारी गराउनुभएको थियो ।

सहभागीहरूलाई शिक्षा तथा तालिम उपसमितिका संयोजक भिमलाल पाण्डेले स्वागत गर्नुभएको थियो भने कार्यक्रमको सञ्चालन शिक्षा तथा तालिम उपसमिति सदस्य शारदा भण्डारीले गर्नुभएको थियो । कार्यक्रममा २५ वर्षदेखि ५० वर्ष उमेर समुहका ६० जना सदस्यको उपस्थिति रहेको थियो ।