सामूहिक साकोसद्वारा ज्येष्ठ सदस्यहरूका लागि दुई दिने 'देश दर्शन' भ्रमण सम्पन्न

तिलोत्तमा, वैशाख ५ 

तिलोत्तमा–३ स्थित सामूहिक बचत तथा ऋण सहकारी संस्था लिमिटेडले आफ्ना ६० वर्षभन्दा माथिका ज्येष्ठ शेयर सदस्यहरूका लागि आयोजना गरेको दुई दिने 'देश दर्शन (धार्मिक तथा पर्यटकीय) भ्रमण कार्यक्रम' सफलतापूर्वक सम्पन्न भएको छ । संस्थाको वार्षिक नीति तथा कार्यक्रम अनुसार २०८३ साल वैशाख ४ र ५ गते पाल्पा र गुल्मीका विभिन्न धार्मिक तथा ऐतिहासिक स्थलहरूको भ्रमण गराइएको हो ।

भ्रमण टोलीले पाल्पाको प्रसिद्ध बराङ्दी शिवालय मन्दिर, रानीघाटस्थित 'नेपालको ताज महल' मानिने रानीमहलको अवलोकन गरेको थियो । त्यसैगरी, धार्मिक संगम स्थल रिडीमा पुगेर तीनमुखे पुल, ऋषिकेश मन्दिर र हनुमान मन्दिरको दर्शन गर्नुका साथै कालीगण्डकी र बडीघाटको संगम स्थल रुद्रवेणीमा भजन-कीर्तन र सामूहिक भोजनसहित रात्री विश्राम गरिएको थियो ।

भ्रमणको दोस्रो दिन गुल्मीको ऐतिहासिक भार्से क्षेत्र अन्तर्गत झुलेथुम कालिका मन्दिर, स्थानीय सङ्ग्रहालय र प्रसिद्ध बौद्ध स्तूपको अवलोकन गरिएको थियो । रानीवन होमस्टेमा स्थानीय परिकारको स्वाद लिँदै टोलीले स्थानीय कला र संस्कृतिको बारेमा जानकारी समेत लिएको थियो ।

भ्रमणमा ५८ जना ज्येष्ठ सदस्य, देश दर्शन उपसमिति, शिक्षा उपसमिति, कर्मचारी र चालक दलसहित कुल ६७ जनाको सहभागिता रहेको थियो । टोलीको नेतृत्व देश दर्शन उपसमिति संयोजक सरिता वस्याल, सदस्यहरू श्री देवप्रसाद गुरूङ, सदस्य श्री शारदा भन्डारी र शिक्षा तथा तालिम उपसमिति संयाेजक श्री भिमलाल पान्डेले गर्नुभएको थियो भने कर्मचारीहरू बुद्धि प्रसाद ज्ञवाली र विष्णु कुमारी पाण्डेले प्राविधिक व्यवस्थापन मिलाउनुभएको थियो ।

ज्येष्ठ सदस्यहरूमा धार्मिक चेतना, आत्मिक सन्तुष्टि र आपसी सम्बन्ध सुदृढ बनाउने उद्देश्यले आयोजित यो कार्यक्रम अत्यन्त उपलब्धिमूलक रहेको संस्थाले जनाएको छ । भ्रमण पश्चात सबै सहभागीहरू सुरक्षित रूपमा तिलोत्तमा फर्किएका छन् ।